ಮಂಥನ
ದಲಿತರಿಗೆ ಒಳಿತನ್ನು ಮಾಡಹೋದ ಪೇಜಾವರ ಶ್ರೀಗಳಿಗೆ ಸಿಕ್ಕಿದ್ದು ಪ್ರತಿಭಟನೆ ಎದುರಿಸುವ ಪ್ರತಿಫಲ!

ಕೆಲವರ ಮನಸ್ಥಿತಿಯೇ ಹಾಗೆ.... ಪರಕೀಯರ ದಾಳಿಗೆ ತುತ್ತಾಗುತ್ತಿರುವ ಹಿಂದುತ್ವವನ್ನು ಜಾತಿ, ಮತಗಳ ಸಂಘರ್ಷದಿಂದ ಉಳಿಸಿ ಬೆಳೆಸಲು ಹೋದರೆ ಮೈಮೇಲೆಯೇ ಎರಗಿ ಬರುತ್ತಾರೆ. ಜಾತಿ, ಮತ, ಪಂಗಡಗಳ ಸಂಕೋಲೆಗಳಿಂದ ಸೊರಗಿರುವ ಹಿಂದುತ್ವವನ್ನು ಬಿಡಿಸಿ ಒಗ್ಗೂಡಿಸಲು ಯತ್ನಿಸಿದರೆ ಅಲ್ಲಿಯ ವರೆಗೂ ಇಲ್ಲದ ಜಾತಿಬೇಧ ತನ್ನಷ್ಟಕ್ಕೆ ತಾನೇ ಜಾಗೃತಗೊಳ್ಳುತ್ತದೆ....

ಉಳಿದಂತೆ ಜಾತ್ಯಾತೀತ, ಸಮಾಜದಲ್ಲಿ ಸಮಾನತೆಯ ಬಗ್ಗೆ ಮಾತನಾಡುವವರು ಹಿಂದುತ್ವದಡಿಯಲ್ಲಿ ಒಗ್ಗಟ್ಟಿನಿಂದ ಗುರುತಿಸಿಕೊಳ್ಳುವ ಸಂದರ್ಭ ಎದುರಾದರೆ "ನಾನು ಕುರುಬ ನಾವೇಕೆ ಮತ್ತೊಂದು ಸಂಪ್ರದಾಯದವರು ಹೇಳಿದ್ದನ್ನು ಒಪ್ಪಿಕೊಳ್ಳಬೇಕು"? ಬೇಕಾದರೆ ಅವರೇ ನಮ್ಮ ಪಂಥವನ್ನು ಒಪ್ಪಿಕೊಳ್ಳಲಿ ಎಂದು ಉದ್ಘರಿಸುತ್ತಾರೆ. ಇಷ್ಟಕ್ಕೂ ಅವರು ಒಪ್ಪಿಕೊಳ್ಳಬೇಕಾಗಿರುವುದು ಅನ್ಯಧರ್ಮದ ಸಂಪ್ರದಾಯವನ್ನೋ ಅಥವಾ ದೇವರನ್ನೋ ಅಲ್ಲ. ಬದಲಾಗಿ ಅವರು ಒಪ್ಪಿಕೊಳ್ಳದಿದ್ದರೂ ಗೌರವಿಸಬೇಕಾಗಿರುವುದು ಹಿಂದುತ್ವವನ್ನು, ಹಿಂದೂ ಎಂಬ ದೈವವನ್ನು. ಇಷ್ಟೆಲ್ಲಾ ಹೇಳಿದ ಮೇಲೂ ವಿಷಯವನ್ನು ವಿವರಿಸಬೇಕಿಲ್ಲ ಎನಿಸುತ್ತದೆ.

ಹೌದು....ಒಂದು ವಾರದಿಂದ ನಡೆಯುತ್ತಿರುವುದು ಹಿಂದೂಗಳೊಳಗಿನ ಯುದ್ಧ, ಧರ್ಮ ವಿರೋಧಿಗಳನ್ನು ಎದುರಿಸಿ ಒಗ್ಗಟ್ಟಿನಿಂದ ಬದುಕಬೇಕಿರುವ ಹಿಂದೂಗಳ ನಡುವಿನ ಜಟಾಪಟಿ. ಅಷ್ಟೇ ಅಲ್ಲಾ, ಯಾವ ಸನ್ಯಾಸಿಗಳು ಧರ್ಮವನ್ನು ಕಾಪಾಡಬೇಕೋ ಅದೇ ಸನ್ಯಾಸಿಗಳ ನಡುವಿನ ಜಟಾಪಟಿಗೆ ರಕ್ಷಣೆಯಾಗಬೇಕಿದ್ದ ಧರ್ಮ ಮೂಕಸಾಕ್ಷಿಯಾಗಿ ನಿಂತಿದೆ! ಪ್ರಶ್ನೆಗಳಿಗೆ ಉತ್ತರ ನಿರೀಕ್ಷಿಸಿ ಪೇಚಿಗೆ ಸಿಲುಕಿಸುವ ಮಾಧ್ಯಮಗಳು ಒಂದೆಡೆಯಾದರೆ, ಪ್ರತಿಕ್ರಿಯೆಯನ್ನು ಬಳಸಿಕೊಂಡು ಪ್ರಹಾರ ಮಾಡುವ ಆಧುನಿಕ ರಾಕ್ಷಸಸರು(ಬುದ್ಧಿ ಜೀವಿಗಳು)ಮತ್ತೊಂದೆಡೆ! ಹೀಗಾದರೆ ಹಿಂದೂ ಧರ್ಮದ ಉಳಿವಾದರೂ ಹೇಗೆ ಸಾಧ್ಯ?

ಅಲ್ಲೆಲ್ಲೋ ಬಲವಂತವಾಗಿಯೋ ಅಥವಾ ಆಮಿಷದ ಮೂಲಕವೋ ಅಸಂಖ್ಯ ಹಿಂದೂಗಳು, ಮಾರಿಯಮ್ಮನನ್ನು ಬಿಟ್ಟು ಮೇರಿಯಮ್ಮನನ್ನು ಒಪ್ಪಿಕೊಳ್ಳುತ್ತಿರುವುದು.... ಇನ್ನೆಲ್ಲೋ ಪಾಂಡುರಂಗನನ್ನು ಬಿಟ್ಟು ಪೈಗಂಬರನನ್ನು ಅಪ್ಪಿಕೊಂಡು ಹೊರ ನಡೆಯುತ್ತಿರುವುದರ ಬಗ್ಗೆ ಯಾರೂ ಉಸಿರೆತ್ತುವುದಿಲ್ಲ. ಉಸಿರೆತ್ತುವುದಿರಲಿ ನಾವೇಕೆ ಅವರನ್ನು ಒಪ್ಪಿಕೊಳ್ಳಬೇಕು ಎಂದು ಪ್ರಶ್ನಿಸುವ ಗೋಜಿಗೂ ಹೋಗುವುದಿಲ್ಲ.

ಅದೇ ತಮ್ಮ ಕೀರ್ತನೆಗಳಲ್ಲಿ ವಿಷ್ಣುವನ್ನು ಕೀರ್ತಿಸಿದ, ನರನಾಡಿಗಳಲ್ಲಿ ಹರಿ ನಾಮವೇ ಹರಿಯುತ್ತಿದೆ ಎಂದು ನಂಬಿದ್ದ ದಾಸ ಶ್ರೇಷ್ಠ ಕನಕದಾಸರ ಅನುಯಾಯಿಗಳು ತಾವಾಗಿಯೇ ವೈಷ್ಣವ ದೀಕ್ಷೆಯನ್ನು ಬಯಸಿ ಬಂದಲ್ಲಿ ದೀಕ್ಷೆ ನೀಡಲು ಸಿದ್ಧ ಎಂಬ ಒಂದೇ ಒಂದು ಮಾತು ಸಾಕು ಬೆಂಕಿಯ ಜ್ವಾಲೆ ಸಿಡಿಯುತ್ತದೆ. ಮತಾಂತರಗೊಳ್ಳುವ ಸಂದರ್ಭದಲ್ಲಿ ಇರದ 'ನಾವೇಕೆ ಒಪ್ಪಿಕೊಳ್ಳಬೇಕು' ಎಂಬ ಪ್ರಶ್ನೆ ಆಗ ಮೂಡುತ್ತದೆ.

ಅಲ್ಲಾ ನನ್ನೋ, ಜೀಸನ್ ನನ್ನೋ ಒಪ್ಪಿಕೊಳ್ಳುವ ಸಂದರ್ಭದಲ್ಲಿ ಜಾಗೃತವಾಗದ ಮನಸ್ಸು ಹಿಂದೂ ದೇವತೆಗಳನ್ನು ಒಪ್ಪಿಕೊಳ್ಳುವಾಗ ಇದ್ದಕ್ಕಿದ್ದಂತೆ ಸೆಟೆದು ನಿಲ್ಲುತ್ತದೆ. ಪರಂಪರಾಗತ ಪೀಠಗಳ ಬಗ್ಗೆ, ಪಂಥದ ಬಗ್ಗೆ ಪ್ರಶ್ನೆ ಮಾಡಲು ಸಿದ್ಧವಾಗುತ್ತದೆ. ಹೀಗೇಕೆ ಎಂದು ನಾವೆಲ್ಲರೂ ಯೋಚಿಸುವಂತೆ ಮಾಡಿಬಿಡುತ್ತದೆ.

ಇಷ್ಟಕ್ಕೂ ಉಡುಪಿಯ ಪೇಜಾವರ ಮಠದ ವಿಶ್ವೇಶ ತೀರ್ಥ ಸ್ವಾಮೀಜಿಗಳು ಹೇಳಿದ್ದರಲ್ಲಿ ಅಂಥಹ ಆಕ್ಷೇಪಾರ್ಹ ಸಂಗತಿಯೇನಿತ್ತು? ಕನಕದಾಸರ ತತ್ವ ಸಿದ್ಧಾಂತಗಳನ್ನು ಒಪ್ಪಿಕೊಳ್ಳುವವರು ವೈಷ್ಣವ ದೀಕ್ಷೆ ಪಡೆಯುವುದರಲ್ಲಿ ಅಂಥಹ ಅಪಚಾರವೇನು? ಕನಕದಾಸರ ಅನುಯಾಯಿಗಳಿಗೆ ಕನಕದಾಸರು ಪೂಜಿಸಿದ್ದ ವಿಷ್ಣು ವರ್ಜ್ಯನೇ? ಅಥವ ವಿಷ್ಣುವನ್ನು ಪೂಜಿಸುವುದಕ್ಕೆ ಪೂರಕವಾದ ವೈಷ್ಣವ ದೀಕ್ಷೆ ಅಮಂಗಲವೇ? ಅಥವಾ ಕುರುಬರು ಹೇಳಿಕೊಳ್ಳುವಂತೆ ಶೈವ ಪಂಥದವರು ಯಾರೂ ವಿಷ್ಣುವನ್ನು ಪೂಜಿಸುವುದಿಲ್ಲವೇ?

ಅಂದು ವಿದ್ಯಾರಣ್ಯರು ಇಲ್ಲದೇ ಇದ್ದಿದ್ದರೆ ಹಕ್ಕ ಬುಕ್ಕರು ವಿಜಯನಗರ ಸಾಮ್ರಾಜ್ಯ ಸ್ಥಾಪನೆ ಮಾಡಲು ಸಾಧ್ಯವಾಗುತ್ತಿತ್ತೇ? ವಿಜಯನಗರ ರಾಜ್ಯ ಸ್ಥಾಪನೆಗೆ ಹಕ್ಕ ಬುಕ್ಕರು, ಯಥಿಗಳಾಗಿದ್ದ ವಿದ್ಯಾರಣ್ಯರ ಮಾರ್ಗದರ್ಶನ ಪಡೆಯದೇ ಶೈವ, ವೈಷ್ಣವ ಎಂದು ಹೊಡೆದಾಡಿದ್ದರೆ ದಕ್ಷಿಣದತ್ತ ನುಗ್ಗುತ್ತಿದ್ದ ಧರ್ಮಧ್ರೋಹಿ(ಬಾಂಧವರನ್ನು) ಯಶಸ್ವಿಯಾಗಿ ತಡೆದು ಹಿಂದೂ ಸಂಸ್ಕೃತಿ ಹಾಗು ಸಂಪ್ರದಾಯವನ್ನು ಉಳಿಸಲು ಸಾಧ್ಯವಿರುತ್ತಿರಲಿಲ್ಲ. ಅಂದು ವಿದ್ಯಾರಣ್ಯರ ಮಾರ್ಗದರ್ಶನ ಪಡೆದವರಿಗೆ ಇಂದು ಪೇಜಾವರ ಶ್ರೀಗಳು ಹೇಳಿರುವ ಮಾತು ಅಪಥ್ಯವಾಗಿದೆ. ಅಂದು ದಾಳಿ ಕೋರರಿಂದ ನಮ್ಮ ಸಂಸ್ಕೃತಿಯನ್ನು ಉಳಿಸಿದವರು ಇಂದು ಅದೇ ಸಂಸ್ಕೃತಿಯ ವಿರುದ್ಧವೇ ತಿರುಗಿಬಿದ್ದಿದ್ದಾರೆ!.

ನಮ್ಮ ಧರ್ಮದಲ್ಲಿ, ಶಿವಶ್ಚ ಹೃದಯಂ ವಿಷ್ಣು, ವಿಷ್ಣೋಶ್ಚ ಹೃದಯಂ ಶಿವ:: ಶಿವನ ಹೃದಯದಲ್ಲಿ ವಿಷ್ಣು ಇದ್ದಾನೆ. ವಿಷ್ಣುವಿನ ಹೃದಯದಲ್ಲಿ ಶಿವನಿದ್ದಾನೆ ಎಂಬ ಮಾತಿದೆ. ದುರ್ದೈವದಿಂದ ನಮ್ಮ ಹಿಂದಿನ ಪರಂಪರೆ ನೀಡಿರುವ ಇಂಥಹ ಮನಸ್ಥಿತಿಯನ್ನು ಯಾರೂ ಅರ್ಥಮಾಡಿಕೊಳ್ಳುವುದಿಲ್ಲ. ಜಾತಿ ಮತ ಎಂಬ ಹೊಡೆದಾಟಕ್ಕೆ ಶೈವ,ವೈಷ್ಣವ ಎಂಬ ಮತ್ತೆರಡು ಹೊಸ ಸೇರ್ಪಡೆ.....

ಇವೆಲ್ಲವನ್ನೂ ಬಿಡಿ..... ಪೇಜಾವರಶ್ರೀಗಳು ಯಾವ ದಲಿತರನ್ನು ಸಮಾಜದ ಮುಖ್ಯವಾಹಿನಿಗೆ ತರಲು ಶ್ರಮಿಸಿ ವಿರೋಧದ ನಡುವೆಯೂ ದಲಿತರ ಶ್ರೇಯೋಭಿವೃದ್ಧಿಗಾಗಿ ಚಿಂತಿಸಿದರೂ ಅದೇ ಪೇಜಾವರಶ್ರೀಗಳ ವಿರುದ್ಧ ನಡೆದ ಪ್ರತಿಭಟನಾ ಸಭೆಯಲ್ಲಿ ಅದೇ ದಲಿತರು ಭಾಗವಹಿಸಿದ್ದು ಎಲ್ಲಕ್ಕಿಂತಲೂ ವಿಪರ್ಯಾಸವೇ ಸರಿ.

ದಲಿತರ ನಿವಾಸಕ್ಕೆ ತೆರಳಿ ಅವರೊಂದಿಗೆ ಬೆರೆತು ಸಮಾನತೆ ತರಲು ಯತ್ನಿಸಿದ ಪೇಜಾವರಶ್ರೀಗಳಿಗೆ ದಲಿತರು ಪ್ರತಿಭಟನೆ ಮಾಡುವ ಮೂಲಕ ತಮ್ಮ ನಿಷ್ಠೆ ತೋರಿಸಿದ್ದಾರೆ ಎಂದರೆ ಎಷ್ಟು ಕೃತಘ್ನರಿರಬೇಕು....? ಇಲ್ಲಿ ಮತ್ತೊಂದು ಗಮನಿಸಬೇಕಾದ ವಿಷಯವೆಂದರೆ, ಚರ್ಚೆಗೆ ಗ್ರಾಸವಾಗಿರುವುದು ಕುರುಬರಿಗೆ ದೀಕ್ಷೆ ನೀಡುವ ವಿಚಾರ. ಪೇಜಾವರಶ್ರೀಗಳು ಹಾಗೂ ಕುರುಬರ ನಡುವೆ ಈ ವಿಷಯ ಬಗೆ ಹರಿಯಬೇಕೆ ಹೊರತು ದಲಿತರು ಈ ಬಗ್ಗೆ ಪ್ರತಿಭಟನೆ ನಡೆಸುವುದು ಎಷ್ಟು ಸಮಂಜಸ? ಇಷ್ಟಕ್ಕೂ ಪೇಜಾವರ ಶ್ರೀಗಳ ಹೇಳಿಕೆ ಆಸಕ್ತರಿಗಷ್ಟೇ ಆಹ್ವಾನ ಇದಕ್ಕೆ ಆಸಕ್ತಿ ಹೊಂದದೇ ಇರುವವರೆಲ್ಲರೂ ಏಕೆ ಮೈಪರಚಿಕೊಳ್ಳಬೇಕು?

ಕೃತಜ್ನತೆ ಹೊಂದಿರದ ಕೆಲವರಿದ್ದಾರೆ. ಪೇಜಾವರ ಶ್ರೀಗಳಿಗೆ ಶೈವ ದೀಕ್ಷೆ ಕೊಡಿಸೋಣ ಎಂದು ಒಬ್ಬರು, ಶ್ರೀಗಳಿಗೆ ಬುದ್ಧಿಯೇ ಇಲ್ಲ ಎಂದು ಮತ್ತೊಬ್ಬರು ಹೇಳುತ್ತಾರೆ. ಬುದ್ಧಿ ಜೀವಿಗಳು ಇಂಥಹ ಆಹಾರಕ್ಕಾಗಿ ಕಾಯುತ್ತಲೇ ಇರುತ್ತಾರೆ. ಇಂಥಹ ತಲೆ ಬುಡವಿಲ್ಲದ ಹೇಳಿಕೆಗಳನ್ನು ನೀಡುತ್ತಲೇ ಇರುತ್ತಾರೆ ಬಿಡಿ. ಆದರೆ ಉಳಿದವರಿಗೆ ಏನಾಗಿದೆ? ಶೈವ ದೀಕ್ಷೆ ನೀಡುವ ಮೂಲಕ ಗುಲಾಮರನ್ನಾಗಿ ಮಾಡಿಕೊಳ್ಳಲು ಪೇಜಾವರ ಶ್ರೀಗಳು ಯತ್ನಿಸುತ್ತಿದ್ದಾರೆ ಎಂದು ಹೇಳುವವರಿಗೆ ತಮ್ಮ ಮತದವರೇ ದಿನ ನಿತ್ಯ ಅದೆಷ್ಟು ಜನ ಮುಸ್ಲಿಮರಾಗುತ್ತಿದ್ದಾರೆ? ಅದೆಷ್ಟು ಜನ ಏಸು ಕ್ರಿಸ್ತನ ಗುಲಾಮರಾಗುತ್ತಿದ್ದಾರೆ ಎಂಬ ಜ್ನಾನವೂ ಇಲ್ಲ. ಇದ್ದಿದ್ದರೆ ಶ್ರೀಗಳಿಗೆ ಧಮಕಿ ಹಾಕುವ ಧೈರ್ಯ ಮಾಡುವ ಮುನ್ನ ಮತಾಂತರಗೊಳಿಸುವವರಿಗೆ ಹಿಂದೂ ಧರ್ಮದ ದೀಕ್ಷೆ ಕೊಡಿಸುವ ಮಾತನ್ನಾಡುತ್ತಿದ್ದರು.

ಎಷ್ಟೇ ಪ್ರಶ್ನಿಸಿದರೂ ಮತಾಂತರ ಜಾತ್ಯಾತೀತತೆ ಆಗುತ್ತದೆ. ಅದೇ ಹಿಂದುತ್ವ ಒಗ್ಗೂಡಿಸ ಯತ್ನಿಸಿದರೆ ಹಿಂದೂಗಳಿಗೆ ಗುಲಾಮಗಿರಿಯಂತೆ ಕಾಣುತ್ತದೆ ಎಂಥ ವಿಪರ್ಯಾಸ ಅಲ್ಲವೇ? ವೈಷ್ಣವ ದೀಕ್ಷೆ ವಿಚಾರವಾಗಿ ವಿರೋಧ ವ್ಯಕ್ತಪಡಿಸುವವರು ಮತಾಂತರವನ್ನೂ ವಿರೋಧಿಸಲಿ, ಮತಾಂತರಗೊಳಿಸುವುದಕ್ಕೆ ಮುಂದಾಗುವವರಿಗೆ ಪೇಜಾವಶ್ರೀಗಳಿಗೆ ಶೈವ ದೀಕ್ಷೆ ಕೊಡಿಸಲು ಕೈಗೊಂಡಂತೆ ದಿಟ್ಟ ನಿರ್ಧಾರ ಕೈಗೊಳ್ಳಲಿ ಇದು ನಿಮ್ಮಿಂದ ಸಾಧ್ಯವೇ ಬುದ್ಧಿ ಜೀವಿಗಳೇ?

 


Readers' Comments (2)

ಭಾವನ01-11-2013:03:23:44 pm

ಚೆನ್ನಾಗಿದೆ. ದಲಿತರ ಬಗ್ಗೆ 'ಕಾಳಜಿ' ತೋರುವ ಕೆಲವು ಪಟ್ಟಭದ್ರ ಹಿತಾಸಕ್ತಿಗಳು ಹಿಂದೂಧರ್ಮವನ್ನೇ ಅವಹೇಳನ ಮಾಡುತ್ತಿದ್ದಾರೆ. ನೆಟ್ಟಗೆ ನಾಲ್ಕಕ್ಷರ ಸರಿಯಾಗಿ ಮಾತನಾಡಲೂ ಬರದ ಕೆಲವರು ಟೀವಿ ಮುಂದೆ ಕೂತು ಶ್ರೀಗಳ ವಿರುದ್ಧ ಬಾಯಿಗೆ ಬಂದಹಾಗೆ ಮಾತನಾಡುತ್ತಿರುವುದು ನೋಡಿದರೆ ಅವರ ಬಗ್ಗೆ ಮರುಕ ಹುಟ್ಟುತ್ತದೆ. ಅವರ ಹಿಂದೆ ಹಿಂದೂಧರ್ಮವನ್ನು ಒಡೆಯುವ ಶಕ್ತಿ ಇರುವುದು ಖಂಡಿತ. ಜೊತೆಗೆ, ದೇವರ ಬಗ್ಗೆ ನಂಬಿಕೆ ಇಲ್ಲದ ಕೆಲವು ಪಾಖಂಢಿ (ಅ)ವಿಚಾರವಾಧಿಗಳಾಂಟೂ ಮಿತಿ ದಾಟಿ ಮಾತನಾಡುತ್ತಿದ್ದಾರೆ. ಎಂತಹ ವಿಪರ್ಯಾಸ!.

Bharath Kumar Sharma K.31-10-2013:02:20:50 pm

ಬಹಳ ಒೞೆಯ್ ಲೇಖನ. ಪೇಜಾವರ ಶ್ರೀಗಳು ಈ ಇಳಿವಯಸ್ಸಿನಲ್ಲಿ ಮಾಡುತ್ತಿರುವ ಸಮಾಜ್ ಕಟ್ಟುವ ಕೆಲಸ, ಅವರನ್ನು ಕೇವಲವಾಗಿ ಕಾಣುವ ಕನಿಷ್ಠರು ತಮ್ಮ ಯೌವ್ವನದಲ್ಲಿಯೂ ಮಾಡಿಲ್ಲ. ದಲಿತ ಬಾಂಧವ್ರೇ ನೀವು ಈ ರೀತಿ ಅವ್ರನ್ನು ಅನ್ನೋದು ನಿಜವಾಗಲೂ ದೌರ್ಭಾಗ್ಯ. ಬ್ರಾಹ್ಮಣರ ವಿರೋಧದ ನಡುವೆ ಕೂಡಾ ನಿಮ್ಮನ್ನು ಆದರದಿಂದ ಕಾಣಲು ಬಂದು ನಿಮ್ಮನ್ನು ಸಮಾಜದ ಮುಖ್ಯ ವಾಹಿನಿಗೆ ತರಲು ಯತ್ನಿಸಿದ ಆ ಭಗವದ್ಸ್ವರೂಪಿಯನ್ನು ಈ ರೀತಿ ಜರಿಯುವಿರೆಂದರೆ, ನಿಮಗೆ ಏನು ಹೇಳಬೇಕೋ ನನಗಂತೂ ತಿಳಿಯದು. ಇನ್ನು ಕುರುಬರೇ, ದಾಸ ಶ್ರೇಷ್ಠ ಕನಕದಾಸರ ಆರಾಧ್ಯ ದೈವವಾದ ಆ ಪರಮಾತ್ಮನನ್ನು ನಿತ್ಯ ಪೂಜಿಸುವ ಆ ಯತಿಗಳಿಗೆ ವಿರುದ್ಧ ನಿಲ್ಲುವ ನಿಮ್ಮ ಸಮಾಜದ ಮಂದಿಯನ್ನು ಆ ದಾಸರೂ ಕೂಡ ಕ್ಷಮಿಸುವುದಿಲ್ಲ. ಎಲ್ಲಾ ವರ್ಗಗಳೂ ಕೂಡ ನನಗೆ ಒಂದೇ ಎಂದು ಕನಕದಾಸರಿಗೆ ದರ್ಶನ ನೀಡುವುದರ ಮೂಲಕ ನಿರೂಪಿಸಿದ ಆ ಪರಮಾತ್ಮ , ಹೀಗೆ ಬದುಕಿರಿ ಎಂದು ಬೋಧಿಸಿದ/ಉದ್ಧರಿಸಿದ ಹಿಂದೂ ಧರ್ಮ ನಿಮಗೆ ಕನಿಷ್ಠವಾಯಿತೇ ?????????????? ಬುದ್ಧಿ \"ಜೀವಿ\"(ಮನುಷ್ಯರಲ್ಲ)ಗಳೇ ನಿಮ್ಮ ಬಗ್ಗೆ ಹೇಳೋದೇನೂ ಇಲ್ಲ. ನಿತ್ಯ ಸಾಯೋರಿಗೆ ಅಳೋರ್ಯಾರು??.....

Select Language : 
Press F12 to toggle Indian language and English
Your Name : 
Characters Remaining: 5000
 
 
Srinivas Rao

Recent Posts

Date :20-08-2014
Date :06-05-2014
Date :17-02-2014
Date :12-01-2014
Date :14-11-2013
Date :30-10-2013
Date :25-09-2013
Date :15-08-2013
Date :29-06-2013
Date :06-06-2013

Copyright © 2011 - 2013 Rishi Systems P. Limited. All rights reserved.